منشیات ڈیلر انمول پنکی کو ویڈیو لنک کے ذریعے عدالت میں پیش کرنے کی اجازت

جوڈیشل مجسٹریٹ جنوبی کی عدالت نے منشیات اسمگلر انمول عرف پنکی کو مختلف مقدمات میں ویڈیو لنک کے ذریعے پیش کرنے کی اجازت دے دی ہے۔ عدالت نے پولیس کی جانب سے دائر درخواست منظور کرتے ہوئے 8 مقدمات میں ملزمہ کی ویڈیو لنک کے ذریعے پیشی کی اجازت دی۔ عدالتی حکم کے مطابق سیکیورٹی وجوہات کی بنا پر چالان پیش ہونے تک ملزمہ کی فزیکل کسٹڈی میں پیشی ضروری نہیں ہے۔ عدالت نے جیل سپرنٹنڈنٹ کو ہدایت کی کہ جب بھی عدالت طلب کرے، ملزمہ کو پیش کیا جائے۔ اس حوالے سے عدالتی حکم میں سختی سے ہدایات جاری کی گئی ہیں۔ واضح رہے کہ پولیس نے اپنی درخواست میں مؤقف اختیار کیا تھا کہ ملزمہ کو عدالت میں پیش کرنے سے نقض امن کا خطرہ پیدا ہو سکتا ہے، اس لیے اسے ویڈیو لنک کے ذریعے پیش کرنے کی اجازت دی جائے۔ بعد ازاں عدالت نے ملزمہ کے خلاف تھانہ گارڈن میں درج ایک مقدمے، گذری تھانے میں درج 6 مقدمات اور تھانہ بغدادی میں درج ایک مقدمے میں ویڈیو لنک کے ذریعے پیشی کی اجازت دے دی ہے۔