پنجاب کا پاسکو سے ایک ملین میٹرک ٹن گندم خریدنے کا فیصلہ

وزیر اعلیٰ پنجاب مریم نواز شریف نے پاسکو سے ایک ملین میٹرک ٹن گندم خریدنے کی منظوری دے دی ہے۔
وزیراعلیٰ پنجاب کی زیر صدارت ویڈیو لنک اجلاس منعقد ہوا جس میں صوبے میں گندم اور آٹے کی موجودہ صورتحال کا تفصیلی جائزہ لیا گیا۔ اجلاس میں متعلقہ حکام نے گندم کے ذخائر اور قیمتوں سے متعلق مکمل بریفنگ دی۔
اجلاس کے دوران اہم فیصلہ کرتے ہوئے پاسکو سے ایک ملین میٹرک ٹن گندم خریدنے کی منظوری دی گئی۔ وزیراعلیٰ نے ہدایت کی کہ آٹے اور گندم کی قیمتوں کو مستحکم رکھنے کے لیے فوری اور مؤثر اقدامات کیے جائیں۔
حکام کے مطابق عوام کو سستا آٹا اور روٹی فراہم کرنے کے لیے فلور ملوں کو گندم 3300 روپے فی من کے حساب سے فراہم کی جائے گی تاکہ مارکیٹ میں قیمتوں کو کنٹرول میں رکھا جا سکے۔
اجلاس میں پنجاب سے دیگر صوبوں کو گندم کی ترسیل سے متعلق امور پر بھی غور کیا گیا۔ بریفنگ میں بتایا گیا کہ گندم کی نقل و حمل سے متعلق بعض خدشات حقیقت پر مبنی نہیں ہیں۔
مزید بتایا گیا کہ صوبے میں گندم کے اسٹاک کو ڈکلیئر کرنے کا عمل جاری ہے اور مکمل ریکارڈ مرتب کیا جا رہا ہے۔ حکام کے مطابق موجودہ فصل کے معیار اور غذائی ضروریات کو مدنظر رکھتے ہوئے اسٹاک کی تفصیلات تیار کی جا رہی ہیں۔
اجلاس میں یہ فیصلہ بھی کیا گیا کہ پنجاب اپنی ضروریات پوری کرنے کے بعد دیگر صوبوں خصوصاً خیبر پختونخوا کو گندم کی فراہمی میں اپنا کردار ادا کرے گا۔

The post پنجاب کا پاسکو سے ایک ملین میٹرک ٹن گندم خریدنے کا فیصلہ first appeared on Daily Qaum.