ملتان ڈویژن، محرم سیکیورٹی پلان، 10 ہزار اہلکار تعینات ہونگے، روٹس پر سہولیات فراہمی کا حکم

ملتان (وقائع نگار ، کرائم رپورٹر) کمشنر ملتان ڈویژن عامر کریم خاں اور آر پی او ملتان ریجن عثمان اکرم گوندل کی مشترکہ زیر صدارت ڈویژنل امن کمیٹی کا اجلاس منعقد ہوا جس میں محرم الحرام کے دوران امن و امان، فول پروف سیکیورٹی، بین المسالک ہم آہنگی اور عزاداروں کو بہترین سہولیات کی فراہمی کے حوالے سے جامع انتظامات کا جائزہ لیا گیا۔ اجلاس میں ڈپٹی کمشنر ملتان نعمان صدیق، ایڈیشنل کمشنر کوآرڈینیشن کریم بخش، ایس ایس پی آپریشنز سمیت متعلقہ محکموں کے افسران ،محمد حنیف جالندھری ، خاور حسین بھٹہ، انجینئر سخاوت علی، مفتی محمد عثمان، مخدوم سید عون رضا شمسی، مولانا عنایت اللہ جمالی شریک ہوئے جبکہ ڈویژن بھر کے ڈپٹی کمشنرز، ڈی پی اوز اور علماء کرام ویڈیو لنک کے ذریعے اجلاس میں شریک ہوئے۔کمشنر عامر کریم خاں نے کہا کہ حکومت پنجاب امن کے قیام کے لیے تمام مکاتب فکر کے علماء کرام سے تعاون کی خواہاں ہے اور وزیراعلیٰ پنجاب کی ہدایت پر ضلعی انتظامیہ کو مکمل اختیارات تفویض کیے گئے ہیں تاکہ محرم الحرام کے دوران امن و امان کو ہر صورت یقینی بنایا جا سکے۔ انہوں نے کہا کہ رواداری، برداشت اور بین المسالک ہم آہنگی کا پیغام ہر مسجد اور منبر سے عام کیا جائے۔ اجلاس میں اس بات پر اتفاق کیا گیا کہ جمعہ کے خطبات میں تمام مساجد میں مذہبی ہم آہنگی اور اتحاد بین المسلمین کا پیغام دیا جائے گا۔کمشنر عامر کریم خاں نے کہا کہ ڈویژنل انتظامیہ نے محرم الحرام کے پرامن انعقاد کے لیے خصوصی ہدایات جاری کر دی ہیں اور جلوسوں و مجالس کے منتظمین سے مسلسل رابطہ رکھا جا رہا ہے۔ انہوں نے واضح کیا کہ ضابطہ اخلاق پر سختی سے عملدرآمد کرایا جائے گا جبکہ خلاف ورزی پر بلاامتیاز کارروائی عمل میں لائی جائے گی۔ نفرت انگیز تقاریر، وال چاکنگ اور اشتعال انگیز مواد کے خلاف زیرو ٹالرنس پالیسی اپنائی گئی ہے۔ محرم الحرام کے دوران سائبر پٹرولنگ مزید مؤثر بنانے اور شرپسند عناصر کی کڑی نگرانی کا بھی فیصلہ کیا گیا ہے۔عامر کریم خاں نے بتایا کہ شدید گرمی کے پیش نظر مرکزی جلوسوں کے راستوں پر پانی کا چھڑکاؤ، فسیلیٹیشن کیمپس اور کلینک آن ویلز قائم کیے جائیں گے جبکہ سبیلوں کے قیام کے لیے ایس او پیز پر سختی سے عملدرآمد یقینی بنایا جائے گا۔ عزاداروں اور زائرین کی سہولت کے لیے ملتان ڈویژن میں 14 مستقل سبیل پوائنٹس قائم کیے جا رہے ہیں۔انہوں نے متعلقہ اداروں کو ہدایت کی کہ جلوسوں کے راستوں سے لٹکتی تاریں، خراب ٹرانسفارمرز اور کھلے مین ہولز فوری طور پر ختم کیے جائیں جبکہ تمام جلوسی راستوں پر پیچ ورک اور مرمتی کام محرم الحرام سے قبل مکمل کیا جائے۔ عزاداروں کی سہولت کے لیے جلوسوں کے روٹس پر اسٹریٹ لائٹس کی تنصیب کا کام جاری ہے اور مجالس و جلوسوں کے راستوں پر سو فیصد اسٹریٹ لائٹس فعال رکھی جائیں گی۔ ہر ضلع اور تحصیل میں 24 گھنٹے فعال کنٹرول رومز بھی قائم کیے جائیں گے۔کمشنر عامر کریم خاں نے کہا کہ محرم الحرام کے دوران نجی ڈرونز کے استعمال پر مکمل پابندی عائد کی گئی ہے جبکہ مون سون بارشوں کے پیش نظر جلوسی راستوں سے بارشی پانی کے فوری نکاس کے لیے پیشگی انتظامات مکمل کیے جائیں۔ انہوں نے تمام اداروں کو باہمی رابطے اور مؤثر کوآرڈینیشن کے ساتھ فرائض انجام دینے کی ہدایت کی۔ انہوں نے بتایا کہ میٹروپولیٹن کارپوریشن کو جلوسی راستوں کی مرمت اور ضروری انتظامات کا ٹاسک سونپا جا چکا ہے جبکہ 9 اور 10 محرم کو لوڈشیڈنگ نہ کرنے اور کم وولٹیج کے سدباب کے لیے متعلقہ اداروں کو مراسلہ ارسال کیا جا رہا ہے۔آر پی او ملتان ریجن عثمان اکرم گوندل نے اجلاس کو بریفنگ دیتے ہوئے بتایا کہ محرم الحرام کے پہلے دس روز کے دوران ڈویژن بھر میں مجموعی طور پر 907 جلوس اور 3173 مجالس منعقد ہوں گی۔ ان میں 160 اے، 380 بی اور 367 سی کیٹیگری کے جلوس شامل ہیں جبکہ 507 اے، 1010 بی اور 1656 سی کیٹیگری کی مجالس منعقد ہوں گی۔ انہوں نے بتایا کہ ملتان ضلع میں سب سے زیادہ 484 جلوس اور 1533 مجالس منعقد ہوں گی جن کے لیے خصوصی سیکیورٹی انتظامات کیے جا رہے ہیں۔آر پی او نے کہا کہ محرم الحرام میں امن و امان کے قیام کے لیے جامع سیکیورٹی پلان مرتب کر لیا گیا ہے اور ڈویژن بھر میں 10 ہزار سے زائد پولیس افسران و جوان ڈیوٹی سرانجام دیں گے۔ تمام حساس مقامات پر خصوصی سیکیورٹی تعینات کی جائے گی تاکہ عزاداروں کو پرامن ماحول فراہم کیا جا سکے۔اجلاس سے خطاب کرتے ہوئے علماء کرام نے کہا کہ محرم الحرام ہمیں برداشت، صبر، ایثار اور بھائی چارے کا درس دیتا ہے۔ انہوں نے اس عزم کا اظہار کیا کہ امن و آشتی کی فضا قائم رکھنے اور بین المسالک ہم آہنگی کے فروغ کے لیے علماء کرام اپنا بھرپور کردار ادا کریں گے۔

The post ملتان ڈویژن، محرم سیکیورٹی پلان، 10 ہزار اہلکار تعینات ہونگے، روٹس پر سہولیات فراہمی کا حکم first appeared on Daily Qaum.